ബോക്സ് ഓഫീസിൽ ചരിത്രം കുറിച്ച് ‘ധുരന്ധർ’

 ആദിത്യ ധർ സംവിധാനം ചെയ്ത രൺവീർ സിംഗ് ചിത്രം “ധുരന്ധർ” തീയേറ്ററുകളിൽ 50 ദിവസം പിന്നിടുമ്പോൾ ബോക്സ് ഓഫീസിൽ പുതിയ റെക്കോർഡുകൾ കുറിക്കുന്നു. ഇന്ത്യയിൽ നിന്ന് മാത്രം 1000 കോടി നെറ്റ് ഗ്രോസ് നേടുന്ന ആദ്യ ചിത്രം എന്ന അപൂർവ്വ നേട്ടം ഈ മെഗാ മാസ് ആക്ഷൻ സ്പൈ ത്രില്ലർ സ്വന്തമാക്കി. ആഗോളതലത്തിൽ 1800 കോടിയിലധികം രൂപയാണ് ചിത്രം ഇതുവരെ വാരിക്കൂട്ടിയത്. ചിത്രത്തിന്റെ ആദ്യ ഭാഗവും 1000 കോടി ക്ലബ്ബിൽ ഇടംപിടിച്ചിരുന്നെങ്കിലും, രണ്ടാം ഭാഗം കൈവരിച്ച ഈ നേട്ടം ഇന്ത്യൻ സിനിമാ ലോകത്തെ വമ്പന്മാരെപ്പോലും അമ്പരപ്പിച്ചിരിക്കുകയാണ്.

ജസ്കിരത് സിംഗ് രംഗി എന്ന കഥാപാത്രമായി രൺവീർ സിംഗ് തകർത്താടിയ ചിത്രത്തിൽ അർജുൻ രാംപാൽ, സഞ്ജയ് ദത്ത്, ആർ. മാധവൻ എന്നിവർ കരുത്തുറ്റ വേഷങ്ങളിലെത്തുന്നു. മാർച്ച് 19-ന് മലയാളം ഉൾപ്പെടെ അഞ്ച് ഭാഷകളിലായി റിലീസ് ചെയ്ത ചിത്രം ആദിത്യ ധർ തന്നെയാണ് രചനയും നിർവ്വഹിച്ചിരിക്കുന്നത്. ജിയോ സ്റ്റുഡിയോസും ബി62 സ്റ്റുഡിയോസും ചേർന്ന് നിർമ്മിച്ച ഈ ചിത്രത്തിൽ അക്ഷയ് ഖന്ന, സാറ അർജുൻ തുടങ്ങിയ വലിയ താരനിരയും അണിനിരക്കുന്നുണ്ട്. 50 ദിവസം പിന്നിടുമ്പോഴും തിയേറ്ററുകളിൽ വലിയ തിരക്ക് അനുഭവപ്പെടുന്നത് ചിത്രത്തിന്റെ സ്വീകാര്യതയുടെ തെളിവാണ്.