മകൾ ദുവയുടെ രണ്ടാം പിറന്നാൾ ദിനത്തിൽ മനോഹരമായ കുടുംബചിത്രങ്ങളും പ്രസവകാല ഫോട്ടോഷൂട്ട് ചിത്രങ്ങളും പങ്കുവെച്ച് ബോളിവുഡ് താരദമ്പതികളായ ദീപിക പദുക്കോണും രൺവീർ സിങ്ങും. ദുവയ്ക്ക് അച്ഛനായ രൺവീറുമായുള്ള മുഖസാമ്യമാണ് ചിത്രങ്ങൾ പുറത്തുവന്നതിനു പിന്നാലെ സമൂഹമാധ്യമങ്ങളിൽ ഏറ്റവും കൂടുതൽ കൗതുകം ജനിപ്പിച്ചത്. മകൾ അച്ചന്റെ തനിപ്പകർപ്പാണെന്നും ജീനുകൾ കള്ളം പറയില്ലെന്നും ചൂണ്ടിക്കാട്ടി നിരവധി ആരാധകരാണ് ചിത്രങ്ങൾക്ക് താഴെ കമന്റുകളുമായി എത്തിയത്. നിലവിൽ രണ്ടാമത്തെ കുഞ്ഞിനെ പ്രതീക്ഷിക്കുന്ന സന്തോഷത്തിലാണ് ഈ താരദമ്പതികൾ.

2018 നവംബർ 14-ന് ഇറ്റലിയിലെ ലേക്ക് കോമോയിൽ വെച്ചായിരുന്നു ദീപികയുടെയും രൺവീറിന്റെയും വിവാഹം. തങ്ങളുടെ കൊങ്കണി, സിന്ധി പാരമ്പര്യങ്ങൾ ഉൾക്കൊണ്ടുകൊണ്ടുള്ള രണ്ട് വ്യത്യസ്ത ചടങ്ങുകളായാണ് ഇവർ വിവാഹിതരായത്. 2013-ൽ ‘ഗോലിയോൺ കി രാസലീല രാം-ലീല’ എന്ന ചിത്രത്തിന്റെ സെറ്റിൽ വെച്ച് പ്രണയത്തിലായ ഇവർ, വർഷങ്ങളുടെ ഡെറ്റിംഗിന് ശേഷം 2015-ൽ രഹസ്യമായി വിവാഹനിശ്ചയവും നടത്തിയിരുന്നു. തുടർന്ന് 2024 സെപ്റ്റംബർ 8-നാണ് ദമ്പതികൾക്ക് ആദ്യത്തെ കുട്ടിയായ ദുവ ജനിക്കുന്നത്.

മാതൃത്വം തന്റെ ജീവിതത്തെയും മുൻഗണനകളെയും ആഴത്തിൽ സ്വാധീനിച്ചതായി ഒരു അഭിമുഖത്തിൽ ദീപിക വ്യക്തമാക്കുകയുണ്ടായി. സ്വന്തം കരിയറിനും ആഗ്രഹങ്ങൾക്കും മാത്രം പ്രാധാന്യം നൽകിയിരുന്ന ജീവിതത്തിൽ നിന്നും, പൂർണ്ണമായും തന്നെ ആശ്രയിച്ചു കഴിയുന്ന മറ്റൊരു ജീവന്റെ ഉത്തരവാദിത്തത്തിലേക്ക് മാറിയത് തന്നെ കൂടുതൽ പക്വതയുള്ളവളാക്കിയെന്ന് താരം പറയുന്നു. ദൈനംദിന നിമിഷങ്ങളെ കൂടുതൽ വിലമതിക്കാനും മാതൃത്വം തന്നെ പഠിപ്പിച്ചതായി ദീപിക കൂട്ടിച്ചേർത്തു.

സിനിമാ കുടുംബത്തിലെ സെലിബ്രറ്റി പദവിയുടെ തീവ്രമായ മാധ്യമ ശ്രദ്ധകളിൽ നിന്നും ക്യാമറക്കണ്ണുകളിൽ നിന്നും മകളെ മാറ്റിനിർത്തി, സാധാരണവും സുരക്ഷിതവുമായ ഒരു ബാല്യകാലം ഉറപ്പാക്കാനാണ് ദീപികയും രൺവീറും ആഗ്രഹിക്കുന്നത്. സിനിമയിലെ വലിയ വിജയങ്ങൾക്കിടയിലും തങ്ങളെ കാലിൽ ഉറപ്പിച്ചുനിർത്തുന്നതിൽ സ്വന്തം മാതാപിതാക്കളുടെ, വിശേഷിച്ച് അമ്മയുടെ സ്വാധീനം വളരെ വലുതാണെന്ന് ദീപിക പലതവണ തുറന്നുപറഞ്ഞിട്ടുണ്ട്.