റിലീസിനൊരുങ്ങി ബോളിവുഡ് ‘ദൃശ്യം 3’

 അജയ് ദേവ്ഗൺ നായകനായെത്തുന്ന ‘ദൃശ്യം 3’ ഹിന്ദി പതിപ്പായ ‘ദൃശ്യം: ദി കൺക്ലൂഷൻ’ ഒക്ടോബർ 2-ന് തിയേറ്ററുകളിലെത്തുകയാണ്. ചിത്രത്തിന്റെ ഔദ്യോഗിക ട്രെയിലർ നിർമ്മാതാക്കളായ പനോരമ സ്റ്റുഡിയോസ് പുറത്തുവിട്ടിട്ടുണ്ട്. അഭിഷേക് പഥക് സംവിധാനം ചെയ്യുന്ന ചിത്രത്തിൽ പ്രകാശ് രാജ്, ശ്രിയ ശരൺ, തബു, ഇഷ ദത്ത, ജയദീപ് അഹ്ലാവത്ത് എന്നിവരാണ് മറ്റ് പ്രധാന വേഷങ്ങളിൽ എത്തുന്നത്. ട്രെയിലറിലെ അജയ് ദേവ്ഗൺ, തബു, ജയദീപ് എന്നിവരുടെ പ്രകടനം വലിയ രീതിയിൽ ശ്രദ്ധിക്കപ്പെട്ടിട്ടുണ്ട്.

മലയാളം ഒറിജിനൽ പതിപ്പിൽ നിന്നും കഥയിൽ ചെറിയ മാറ്റങ്ങളോടെയാകും ഹിന്ദി റീമേക്ക് എത്തുന്നത് എന്നത് പ്രേക്ഷകരുടെ കാത്തിരിപ്പ് ഇരട്ടിയാക്കുന്നുണ്ട്. ഹിന്ദി പ്രേക്ഷകരുടെ അഭിരുചിക്കനുസരിച്ച് തിരക്കഥയിൽ മാറ്റങ്ങൾ വരുത്തുമെന്ന് സംവിധായകൻ ജീത്തു ജോസഫ് മുൻപ് വ്യക്തമാക്കിയിരുന്നു. ദൃശ്യം ആദ്യ രണ്ട് ഭാഗങ്ങളിൽ നിന്നും വ്യത്യസ്തമായി, ജോർജുകുട്ടിയുടെ മാനസിക തലത്തിനാണ് മൂന്നാം ഭാഗത്തിൽ കൂടുതൽ പ്രാധാന്യം നൽകിയിരിക്കുന്നത്.

ഒരു ത്രില്ലർ ചിത്രത്തിൽ ഇത്തരം മാറ്റങ്ങൾ വരുത്തുമ്പോൾ അതിന്റെ അന്തിമ ഫലം എങ്ങനെയായിരിക്കുമെന്ന കൗതുകം മലയാളികൾക്കുമുണ്ട്. ഹിന്ദി ‘ദൃശ്യം’ ആദ്യ ഭാഗത്തിന്റെ കഥയിൽ ഏറെ നിർണ്ണായകമായ ഒക്ടോബർ 2 തന്നെയാണ് ഈ ചിത്രത്തിന്റെ റിലീസ് തീയതിയായി തെരഞ്ഞെടുത്തിരിക്കുന്നത് എന്നതും പ്രത്യേകതയാണ്.