വിജയ്യെ നായകനാക്കി എച്ച് വിനോദ് ഒരുക്കുന്ന ചിത്രമാണ് ജനനായകന്‍. സിനിമയുടെ ഓഡിയോ ലോഞ്ച് ഇന്നലെ മലേഷ്യയില്‍ നടന്നിരുന്നു. വലിയ വരവേല്‍പ്പാണ് ഈ ചടങ്ങിന് ലഭിച്ചത്. ലക്ഷക്കണക്കിന് വിജയ് ആരാധകര്‍ ആണ് പരിപാടിയില്‍ പങ്കെടുത്തത്. ഇപ്പോഴിതാ അനിരുദ്ധിനെക്കുറിച്ച് വിജയ് പറഞ്ഞ വാക്കുകള്‍ ആണ് ചര്‍ച്ചയാകുന്നത്. ഒരു മ്യൂസിക്കല്‍ ഡിപ്പാര്‍ട്ട്മെന്റല്‍ സ്റ്റോര്‍ ആണ് അനിരുദ്ധ് എന്നും തന്നെ ഒരിക്കലും അനിരുദ്ധ് നിരാശപ്പെടുത്തിയിട്ടില്ലെന്നും വിജയ് പറഞ്ഞു.

'അനിരുദ്ധിന് ഞാനൊരു പുതിയ പേര് നല്‍കുകയാണ്. എംഡിഎസ് - മ്യൂസിക്കല്‍ ഡിപ്പാര്‍ട്ട്മെന്റല്‍ സ്റ്റോര്‍. ആ സ്റ്റോര്‍ തുറന്ന് ഉള്ളില്‍ പോയാല്‍ എന്തുവേണമെങ്കിലും ഇഷ്ടമുള്ള രീതിയില്‍ എടുത്തുകൊണ്ട് ഹാപ്പിയായി പുറത്തിറങ്ങാം. അത് പാട്ടുകള്‍ ആയാലും, ബിജിഎം ആയാലും എഫക്ടുകള്‍ ആയാലും അനിരുദ്ധിന്റെ പക്കല്‍ നിന്ന് ലഭിക്കും. എന്നെ ഒരിക്കലും അനിരുദ്ധ് നിരാശപ്പെടുത്തിയിട്ടില്ല. അത് എന്റെ സിനിമകള്‍ക്കായാലും മറ്റുള്ളവരുടെ സിനിമകളിലെ പാട്ടുകളായാലും ശരി. പടി പടിയായി കയറി മുകളിലേക്ക് പോകുകയാണ് അനിരുദ്ധ്', വിജയ്യുടെ വാക്കുകള്‍.
രാഷ്ട്രീയ പ്രവേശനത്തിന് മുന്നോടിയായി വിജയ് അഭിനയിക്കുന്ന അവസാന ചിത്രമാണിത്. ജനുവരി 9 നാണ് ചിത്രം തിയേറ്ററില്‍ എത്തുന്നത്.