ഭക്തിപൂർവ്വം ചെയ്യുന്ന ദേവാരാധനകളിൽ വച്ച് ഏറ്റവും ശ്രേഷ്ഠമാണ് വ്രതങ്ങൾ എന്ന് പറയപ്പെടുന്നു. പുലർച്ചെ ശരീരശുദ്ധി വരുത്തി, നാമമന്ത്രങ്ങൾ ഉരുവിട്ട് ഒരുനേരം അരിയാഹാരം കഴിച്ചോ, പൂർണമായ ഉപവാസമെടുത്തോ ആചരിക്കുന്ന വ്രതങ്ങൾക്ക് അത് അനുഷ്ഠിക്കുന്ന ദിനങ്ങൾക്ക് അനുസൃതമായി പല ഫലങ്ങളാണുള്ളത്

സ്ത്രീകൾ മാത്രം അനുഷ്ടിച്ചു വരുന്ന വ്രതമാണ് തിങ്കളാഴ്ച വ്രതം. ഒരു പെൺകുട്ടി ഋതുമതിയാകുന്ന സമയം മുതൽ ഇഷ്ടവര പ്രാപ്തിക്കായി ആചരിച്ചു വരുന്ന ഈ വ്രതം വൈധവ്യ കാലത്താണ് നിർത്തുക. പ്രാണപ്രേയസിയായ സതിയുടെ ദേഹത്യാഗം മൂലം തീവ്രവൈരാരിയായ ദക്ഷിണാമൂർത്തിയെക്കൊണ്ട് തന്റെ ഭർത്തൃപദം പാർവ്വതി സ്വീകരിപ്പിച്ചത് സോമവാരവ്രതം കൊണ്ടാണെന്നാണ് ഐതിഹ്യം. സർവ്വശക്തനായ പരമേശ്വരന്റെ പ്രീതി ലഭിക്കുന്നതിനായും എല്ലാ മംഗല്യസ്ത്രീകളും ഈ വ്രതം ആചരിക്കാറുണ്ട്‌.

തിങ്കളാഴ്ച അതിരാവിലെ എഴുന്നേറ്റു കുളിക്കുകയും വെളള വസ്ത്രത്തോടുകൂടി രുദ്രാക്ഷവും ഭസ്മവും ധരിച്ചാണ് ശിവക്ഷേത്ര ദർശനം നടത്തേണ്ടത്. നമഃശിവായ എന്ന പഞ്ചാക്ഷരീ മന്ത്രം ജപിച്ചാണ് ക്ഷേത്രത്തിൽ പ്രദക്ഷിണം ചെയ്യേണ്ടത്. ആ ദിവസം പകൽ മുഴുവൻ ആഹാരം കഴിക്കാതെ പരമശിവനെ ഭജിക്കണം. കഴിയുമെങ്കിൽ സന്ധ്യയ്ക്കു വീണ്ടും ശിവക്ഷേത്രത്തിൽ ദർശനം നടത്തുന്നത് നല്ലതാണ്. തുടർന്ന് അർഹനെന്നു തോന്നുന്ന ബ്രാഹ്മണനു ദക്ഷിണ നൽകി വ്രതത്തിനൊടുവിൽ കഴിക്കുന്ന തീർഥം കഴിച്ചാണ് വ്രതം അവസാനിപ്പിക്കേണ്ടത്.

അമാവാസിയും തിങ്കളാഴ്ചയും ഒത്തു ചേർന്നു വരുന്ന ദിവസം ഈ വ്രതം അനുഷ്ഠിച്ചാൽ അതിന് വിശേഷ ഫലസിദ്ധിയുണ്ടാകുമെന്നാണ് ജ്യോതിശാസ്ത്ര മതം. ജാതകത്തിൽ ചന്ദ്രന് പക്ഷബലമുണ്ടെങ്കിൽ അവർ ചന്ദ്രദശാകാലത്ത് തിങ്കളാഴ്ച വ്രതം അനുഷ് ഠിക്കുമ്പോൾ ദുർഗ്ഗാ ക്ഷേത്രത്തിൽ ദർശനം നടത്തുകയും വെളുത്ത പൂക്കൾ കൊണ്ട് അർച്ചന നടത്തുകയും ദേവീ മാഹാത്മ്യം വായിക്കുകയും ചെയ്യണം. ജാതകത്തിൽ ചന്ദ്രന് പക്ഷബലമില്ലെങ്കിൽ അവർ ചന്ദ്രദശാകാലത്ത് തിങ്കളാഴ്ച ദിവസം ഭദ്രകാളീ ക്ഷേത്ര ദർശനമാണ് നടത്തേണ്ടത്.