പുതിയ പാസ്പോർട്ടുള്ള പ്രവാസികൾക്ക് എസ്ഐആറിൽ പേര് ചേർക്കാനാകുന്നില്ലെന്ന് ചൂണ്ടിക്കാട്ടി മുസ്ലിം ലീഗ് തെരഞ്ഞെടുപ്പ് കമ്മീഷനെ സമീപിച്ചു. വെബ്സൈറ്റിൽ ഇതനുസരിച്ച് മാറ്റം വരുത്തണമെന്നാവശ്യപ്പെട്ട് ലീഗ് ദേശീയ വൈസ് പ്രസിഡന്റ് കെ. സൈനുൽ ആബിദീൻ കേന്ദ്ര തെരഞ്ഞെടുപ്പ് കമ്മീഷന് പരാതി നൽകി. മുഖ്യതെരഞ്ഞെടുപ്പ് ഓഫീസർക്കും നിവേദനം നൽകിയിട്ടുണ്ട്.

പുതിയ പാസ്പോർട്ടുള്ള പ്രവാസികൾക്ക് ഫോം6 പൂർത്തിയാക്കുന്നതിനിടെ പാസ്പോർട്ട് നമ്പർ ചേർക്കാനാകാത്ത സാങ്കേതിക പ്രശ്നം നേരിടുന്നുണ്ടായിരുന്നു. പുതിയ പാസ്പോർട്ടിൽ രണ്ട് ആൽഫബറ്റുകളും ബാക്കി നമ്പരുകളുമാണുണ്ടായിരുന്നത്. പഴയ പാസ്പോർട്ടിൽ ഒരു ആൽഫബറ്റും ബാക്കി നമ്പരുകളുമായതിനാൽ തന്നെ സാങ്കേതികമായി പുതിയ പാസ്പോർട്ടുള്ള പ്രവാസികൾ ഫോം പൂരിപ്പിക്കുമ്പോൾ പ്രതിസന്ധി നേരിട്ടിരുന്നു.

പ്രവാസികളുടെ ബുദ്ധിമുട്ടിൽ പരിഹാരം കാണാൻ തെരഞ്ഞെടുപ്പ് കമ്മീഷൻ ഇതുവരെയും നടപടിയെടുത്തിരുന്നില്ല. മുസ്ലിം ലീഗ് ദേശീയ വൈസ് പ്രസിഡന്റും പ്രവാസി വ്യവസായിയുമായ സൈനുൽ ആബിദീനാണ്പരാതിയുമായി തെരഞ്ഞെടുപ്പ് കമ്മീഷനെ സമീപിച്ചിരിക്കുന്നത്.