കോട്ടയം : തിരുവാതുക്കലില്‍ ദമ്പതിമാരുടെ കൊലപാതകവുമായി ബന്ധപ്പെട്ട് കസ്റ്റഡിയിൽ ആരുമില്ലെന്ന് കോട്ടയം എസ്.പി ഷാഹുല്‍ ഹമീദ്. പ്രതികളെ കുറിച്ച് വ്യക്തമായ സൂചനകൾ ലഭിച്ചിട്ടുണ്ട്. ക്രൂരമായ രീതിയിലാണ് കൊലപാതകങ്ങൾ നടന്നിട്ടുള്ളത്. ഭർത്താവിന്റെയും ഭാര്യയുടെയും മൃതദേഹ​ങ്ങൾ രണ്ട് വ്യത്യസ്ത മുറികളിലാണുള്ളത്. എഫ്.ഐ.ആർ രജിസ്ട്രേഷൻ പൂർത്തിയായതിനുശേഷം ശാസ്ത്രീയ പരിശോധനകൾ നടത്തും. 

വീടിന്റെ മുൻവശത്തെ വാതിൽ തുറന്നാണ് പ്രതി അകത്തുകയറിയിരിക്കുന്നത്. സ്ക്രൂ ഡ്രൈവർ ഉപയോ​ഗിച്ച് അടുത്തുള്ള ജനൽ തുറന്ന് അതുവഴി വാതിൽ തുറന്നെന്നാണ് ഇപ്പോഴത്തെ അനുമാനം. വീടിന്റെ ഔട്ട്ഹൗസിൽ നിന്നാണ് അക്രമത്തിന് ഉപയോ​ഗിച്ച കോടാലി എടുത്തിരിക്കുന്നത്. അത് ലഭിച്ചിട്ടുണ്ട്. മുൻവശത്തെ വാതിൽ തുറക്കാനായാണ് അമ്മിക്കല്ല് കൊണ്ടുവന്നതെന്നാണ് തോന്നുന്നത്. അതിന്റെ ആവശ്യം വരാത്തതിനാൽ അവിടെ തന്നെ ഇട്ടിരിക്കുകയാണ്. കൊലപാതകം വ്യക്തിപരമായ കാരണം കൊണ്ടാണെന്നാണ് നി​ഗമനമെന്നും അദ്ദേഹം പറ‍ഞ്ഞു.