ബാലുശ്ശേരി കോട്ട ക്ഷേത്രത്തിലെ സ്വർണ ഉരുപ്പടികൾ കാണാതായ സംഭവം ; മുൻ എക്സിക്യൂട്ടീവ് ഓഫീസർ അറസ്റ്റിൽ

 ബാലുശ്ശേരി: വൻ വിവാദങ്ങൾക്കും ജനകീയ പ്രതിഷേധങ്ങൾക്കും വഴിതെളിച്ച ബാലുശ്ശേരി കോട്ട വേട്ടയ്ക്കൊരുമകൻ ക്ഷേത്രത്തിലെ സ്വർണ ഉരുപ്പടികൾ കാണാതായ സംഭവത്തിൽ മുൻ എക്സിക്യൂട്ടീവ് ഓഫീസർ ടി.ടി. വിനോദനെ ബാലുശ്ശേരി പോലീസ് അറസ്റ്റ് ചെയ്തു. കേസ് രജിസ്റ്റർ ചെയ്ത് എട്ടുമാസമായിട്ടും പ്രതിയെ പിടികൂടാത്തതിനെതിരെ വ്യാപകമായ പ്രതിഷേധം ഉയർന്ന സാഹചര്യത്തിലാണ് പോലീസിന്റെ നിർണായക നടപടി.

മലബാർ ദേവസ്വം ബോർഡിന്റെ കീഴിലുള്ള ഈ പ്രസിദ്ധമായ ക്ഷേത്രത്തിൽ കഴിഞ്ഞവർഷം നടന്ന ഓഡിറ്റിങ്ങിലാണ് 20 പവനിലേറെ വരുന്ന സ്വർണ ഉരുപ്പടികൾ കാണാനില്ലെന്ന ഞെട്ടിക്കുന്ന വിവരം പുറത്തുവരുന്നത്. തുടർന്ന് അന്നത്തെ എക്സിക്യൂട്ടീവ് ഓഫീസറായിരുന്ന വിനോദനെതിരെ പോലീസ് കേസെടുത്തെങ്കിലും ഇയാൾ ഒളിവിലാണെന്ന മറുപടി നൽകി അന്വേഷണം നീട്ടിക്കൊണ്ടുപോവുകയായിരുന്നു. പ്രതിയെ സംരക്ഷിക്കാൻ ബോധപൂർവമായ ശ്രമം നടക്കുന്നുവെന്ന് ആരോപിച്ച് വിവിധ ഹൈന്ദവ സംഘടനകൾ ക്ഷേത്രപരിസരത്തും പോലീസ് സ്റ്റേഷനിലേക്കും നിരന്തരം ശക്തമായ സമരങ്ങൾ സംഘടിപ്പിച്ചിരുന്നു. പിൽക്കാലത്ത് തെരഞ്ഞെടുപ്പ് പ്രഖ്യാപനത്തെ തുടർന്നാണ് ഈ പ്രതിഷേധ പരിപാടികൾ താൽക്കാലികമായി മാറ്റിവെച്ചത്.

ബാലുശ്ശേരി കോട്ട ക്ഷേത്രത്തിന് പുറമെ മലബാർ ദേവസ്വം ബോർഡിന് കീഴിലുള്ള മറ്റ് മൂന്ന് ക്ഷേത്രങ്ങളിൽനിന്നും സമാനമായ രീതിയിൽ സ്വർണ ഉരുപ്പടികൾ നഷ്ടപ്പെട്ടിരുന്നതായി സൂചനയുണ്ട്. എന്നാൽ അവിടെയൊന്നും നിയമനടപടികളിലേക്ക് കടക്കാൻ അധികൃതർ തയ്യാറാകാതിരുന്നിട്ടും, ബാലുശ്ശേരിയിൽ ഉയർന്ന ശക്തമായ ജനകീയ സമ്മർദത്തെ തുടർന്നാണ് ഒടുവിൽ ദേവസ്വം അധികൃതർ പോലീസിൽ പരാതി നൽകാൻ നിർബന്ധിതരായത്.