തിരുവനന്തപുരം: കേരളത്തിന്റെ സ്വന്തം ഇന്റർനെറ്റ് കണക്ഷനായ കെഫോണിൽ പുതിയ താരിഫ് പ്ലാനുകൾ നിലവിൽ വന്നു. നേരത്തേയുള്ള പ്ലാനുകൾക്ക് പുറമേ പുതുതായി ഒരു പ്ലാൻ കൂടി പുതിയ താരിഫിൽ ഉൾപ്പെടുത്തിയിട്ടുണ്ട്. പഴയ പ്ലാനുകൾ നിരക്കുവർധനയില്ലാതെ നിലനിർത്തുകയും രണ്ടു പ്ലാനുകളിൽ ഡാറ്റാ ലിമിറ്റ് വർധിപ്പിക്കുകയും ചെയ്തു.

349 രൂപയുടെ ബേസിക് പ്ലസ് പാക്കേജാണ് പുതുതായി കെഫോൺ പ്ലാനിൽ ഉൾപ്പെടുത്തിയിരിക്കുന്നത്. ഇത് പ്രകാരം 30 എംബിപിഎസ് വേഗതയിൽ ഒരു മാസത്തേക്ക് 3000 ജിബി ഡാറ്റ ഉപഭോക്താക്കൾക്ക് ആസ്വദിക്കാനാകും. നേരത്തേ നിലവിലുണ്ടായിരുന്ന 399 രൂപയുടെ കെഫോൺ ഫ്‌ളക്‌സ് പാക്കേജിൽ 3000 ജിബി ഡാറ്റ ലിമിറ്റുണ്ടായിരുന്നത് 3500 ജിബിയായി ഉയർത്തിയിട്ടുണ്ട്. 40 എംബിപിഎസ് വേഗതയാണ് ഈ പാക്കേജിൽ ലഭ്യമാകുക. 599 രൂപയുടെ കെഫോൺ ടർബോ പാക്കേജിൽ 3500 ജിബി ഡാറ്റ ലിമിറ്റ് ഉണ്ടായിരുന്നത് 4000 ജിബിയായി ഉയർത്തിയിട്ടുണ്ട്. 100 എംബിപിഎസ് വേഗത ഈ പാക്കേജിൽ ആസ്വദിക്കാനാകും. മറ്റ് പാക്കേജുകൾ മാറ്റമില്ലാതെ തുടരും.

299 രൂപയുടെ കെഫോൺ ബേസിക് പാക്കേജിൽ 20 എംബിപിഎസ് വേഗതയിൽ 1000 ജിബി വരെ ഇന്റർനെറ്റ് ആസ്വദിക്കാം. 449 രൂപയുടെ കെഫോൺ പ്ലസ് പാക്കേജിൽ 50 എംബിപിഎസ് വേഗതയിൽ 3500 ജിബി ഇന്റർനെറ്റ് ലഭിക്കും. 499 രൂപയുടെ കെഫോൺ മാസ് പാക്കേജിൽ 75 എംബിപിഎസ് വേഗതയിൽ 3500 ജിബി ഇന്റർനെറ്റ് ലഭ്യമാകും. 799 രൂപയുടെ കെഫോൺ ടർബോ സൂപ്പർ പാക്കേജിൽ 150 എംബിപിഎസ് വേഗതയിൽ 4000 ജിബി ഇന്റർനെറ്റ് ലഭിക്കും. 999 രൂപയുടെ കെഫോൺ സെനിത് പാക്കേജിൽ 200 എംബിപിഎസ് വേഗതയിൽ 4000 ജിബി ഇന്റർനെറ്റ് ലഭ്യമാകും. 1499 രൂപയുടെ കെഫോൺ സെനിത് സൂപ്പർ പാക്കേജിൽ 300 എംബിപിഎസ് വേഗതയിൽ 5000 ജിബി ഇന്റർനെറ്റാണ് ലഭിക്കുക.

പുതിയ ഉപഭോക്താക്കൾക്ക് ആദ്യ ടേം റീച്ചാർജിനൊപ്പം അഡീഷണൽ വാലിഡിറ്റി കൂടാതെ ബോണസ് വാലിഡിറ്റി കൂടി ലഭിക്കുന്ന വെൽക്കം ഓഫറും കെഫോണിൽ നിലവിലുണ്ട്. പുതിയ കണക്ഷനുകൾ ലഭിക്കുന്നതിനായി https://selfcare.kfon.co.in/dm.php എന്ന ലിങ്ക് വഴി രജിസ്റ്റർ ചെയ്തോ 18005704466 എന്ന നമ്പരിൽ ബന്ധപ്പെട്ടോ enteKfon ആപ്പ് വഴിയോ അപേക്ഷിക്കാവുന്നതാണ്.