സുരക്ഷാ ക്യാമറ വിപണിയിൽ തികച്ചും വ്യത്യസ്തമായ ഒരു പരീക്ഷണത്തിനൊരുങ്ങി ആപ്പിൾ. വീഡിയോകൾ പകർത്തി സൂക്ഷിക്കുന്ന പതിവ് രീതികൾ ഒഴിവാക്കി, ആർട്ടിഫിഷ്യൽ ഇന്റലിജൻസിന്റെ സഹായത്തോടെ വീടുകൾ നിരീക്ഷിക്കാൻ കഴിയുന്ന നൂതന സ്മാർട്ട് ഹോം ക്യാമറ കമ്പനി വികസിപ്പിക്കുന്നതായാണ് പുതിയ റിപ്പോർട്ടുകൾ വ്യക്തമാക്കുന്നത്. ബ്ലൂംബെർഗ് മാധ്യമപ്രവർത്തകനായ മാർക്ക് ഗുർമാൻ പുറത്തുവിട്ട വിവരപ്രകാരം ‘ജെ450’ എന്ന കോഡ് നാമത്തിലാണ് ഈ പുതിയ ഉപകരണം ആപ്പിൾ നിർമ്മിച്ചുകൊണ്ടിരിക്കുന്നത്.

ഈ പുതിയ ക്യാമറയ്ക്ക് പരമ്പരാഗത സുരക്ഷാ ക്യാമറകളിലേതുപോലെ ഉയർന്ന ഫ്രെയിം റേറ്റോ ദൃശ്യങ്ങൾ റെക്കോർഡ് ചെയ്ത് സൂക്ഷിക്കാനുള്ള സൗകര്യമോ ഉണ്ടായിരിക്കില്ല. പകരം, കുറഞ്ഞ ഫ്രെയിം റേറ്റിലുള്ള ഇമേജ് സെൻസർ ഉപയോഗിച്ച് വീടിനുള്ളിലെ കാര്യങ്ങൾ നിരീക്ഷിക്കുകയും, ആ വിവരങ്ങൾ ക്ലൗഡിലേക്ക് അയയ്ക്കാതെ ഉപകരണത്തിൽ തന്നെയുള്ള എഐ സംവിധാനം വഴി വിശകലനം ചെയ്യുകയും ചെയ്യും. ഇത് ഡാറ്റാ ചോർച്ച സംബന്ധിച്ച ഉപഭോക്താക്കളുടെ പ്രധാന ആശങ്കയായ സ്വകാര്യതയ്ക്ക് പൂർണ്ണമായ സുരക്ഷ നൽകുമെന്നാണ് വിലയിരുത്തപ്പെടുന്നത്.

വീഡിയോ ദൃശ്യങ്ങൾക്ക് പകരം ടെക്സ്റ്റ് സന്ദേശങ്ങൾ നൽകുന്ന രീതിയാണ് ഇതിൽ ആവിഷ്കരിച്ചിരിക്കുന്നത്. മുഖം തിരിച്ചറിയൽ സാങ്കേതികവിദ്യയിലൂടെ മുറിയിലുള്ളവരെ തിരിച്ചറിയാൻ ക്യാമറയ്ക്ക് കഴിയുമെങ്കിലും, വീഡിയോയ്ക്ക് പകരം “ആ വ്യക്തി സ്വീകരണമുറിയിൽ പ്രവേശിച്ചു” എന്ന തരത്തിലുള്ള വാചക രൂപത്തിലുള്ള അറിയിപ്പുകളായിരിക്കും ഉപയോക്താവിന്റെ ഫോണിൽ ലഭിക്കുക. അതുകൊണ്ടുതന്നെ ഇതൊരു പരമ്പരാഗത നിരീക്ഷണ ക്യാമറയേക്കാൾ ഉപരി, വീടിന്റെ സുരക്ഷ വിവരങ്ങൾ കൃത്യമായി അറിയിക്കുന്ന ഒരു സ്മാർട്ട് അസിസ്റ്റന്റായി പ്രവർത്തിക്കും.

ആപ്പിളിന്റെ വിശാലമായ സ്മാർട്ട് ഹോം പദ്ധതിയുടെ ഭാഗമായാണ് ഈ ഉപകരണം വരുന്നത്. ക്യാമറയ്ക്ക് പുറമെ 6 ഇഞ്ച് ഡിസ്പ്ലേയുള്ള സ്മാർട്ട് ഹോം ഹബ്ബ്, പുതിയ ഹോംപോഡ് മിനി, നവീകരിച്ച ആപ്പിൾ ടിവി എന്നിവയും കമ്പനിയുടെ പരിഗണനയിലുണ്ട്. എഐ അടിസ്ഥാനമാക്കിയുള്ള സിരി ആയിരിക്കും ഈ മുഴുവൻ സ്മാർട്ട് ഹോം ഉപകരണങ്ങളുടെയും നിയന്ത്രണം ഏറ്റെടുക്കുക. ഒക്ടോബർ 13-ന് നടക്കാനിരിക്കുന്ന ആപ്പിൾ ഇവന്റിൽ ഈ ഉൽപ്പന്നങ്ങൾ സംബന്ധിച്ച ഔദ്യോഗിക പ്രഖ്യാപനങ്ങൾ ഉണ്ടായേക്കുമെന്നാണ് ടെക് ലോകം ഉറ്റുനോക്കുന്നത്.