Tuesday November 19th, 2019 - 11:27:pm
topbanner

സംഘ പരിവാര്‍ ഫാസിസത്തിനും ഇടതുപക്ഷത്തിന്റെ ജനവിരുദ്ധ ഭരണത്തിനുമെതിരായി ഉപതെരഞ്ഞെടുപ്പോടെ ജനം വിധിയെഴുതും : വെല്‍ഫെയര്‍ പാര്‍ട്ടി

princy
സംഘ പരിവാര്‍ ഫാസിസത്തിനും ഇടതുപക്ഷത്തിന്റെ ജനവിരുദ്ധ ഭരണത്തിനുമെതിരായി ഉപതെരഞ്ഞെടുപ്പോടെ ജനം വിധിയെഴുതും  : വെല്‍ഫെയര്‍ പാര്‍ട്ടി

തിരുവനന്തപുരം: ജനാധിപത്യത്തെയും മതനിരപേക്ഷതയെയും രാജ്യത്തിന്‍റെ വൈവിധ്യത്തെയും തകര്‍ക്കുന്ന സംഘ പരിവാര്‍ ശക്തികള്‍ക്കും സംസ്ഥാന ഭരണം കയ്യാളുന്ന ഇടതു സര്‍ക്കാരിന്‍റെ ജനവിരുദ്ധതക്കുമെതിരായ വിധിയെഴുത്തായി വരാന്‍പോകുന്ന ഉപതെരഞ്ഞെടുപ്പ് ഫലം മാറണമെന്ന് വെല്‍ഫെയര്‍ പാര്‍ട്ടി നേതാക്കള്‍ പത്രസമ്മേളനത്തില്‍ പറഞ്ഞു.

കേരളഓണ്‍ലൈന്‍ വാര്‍ത്തകള്‍ ടെലിഗ്രാമില്‍ ലഭിക്കാന്‍ ക്ലിക്ക് ചെയ്യുക

വീണ്ടും അധികാരത്തില്‍ വന്ന മോദി സര്‍ക്കാര്‍ ജനാധിപത്യത്തെയും മതനിരപേക്ഷതയെയും കൊലപ്പെടുത്തിയിരിക്കുന്നു. എല്ലാ ഭരണഘടനാ സ്ഥാപനങ്ങളെയും നിര്‍വീര്യമാക്കി സംഘപരിവാര്‍ സമഗ്രാധിപത്യമാണ് നടപ്പിലാക്കുന്നത്. വംശീയ അതിക്രമത്തിന് രാജ്യത്തെ ന്യൂനപക്ഷ-ദലിത്-ആദിവാസി ജനവിഭാഗങ്ങള്‍ നിരന്തരമായി ഇരയാവുകയാണ്. ഭരണകൂടത്തെ വിമര്‍ശിച്ചാല്‍ രാജ്യദ്രോഹമാകുന്ന സൈനിക രാജ്യമായി ഇന്ത്യയെ മാറ്റിയിരിക്കുന്നു.

സാമ്പത്തിക തകര്‍ച്ച, തൊഴിലില്ലായ്മ, വ്യാപാര-വ്യവസായ മേകലകളിലെ മുരടിപ്പ്, കാര്‍ഷിക തകര്‍ച്ച എന്നിവയെല്ലാം മോദി ഭരണകൂടത്തിന്‍റെ കോര്‍പറേറ്റ് പ്രേമവും സാധാരണ ജനങ്ങളോടുള്ള അവഗണനയില്‍ നിന്നും ഉണ്ടാകുന്നതാണ്. പൗരവകാശത്തിനും ജനാധിപത്യ മൂല്യങ്ങള്‍ക്കും പ്രധാന്യം നല്‍കുന്ന കേരളീയ ജനങ്ങളുടെ ശക്തമായ പ്രഹരം  ഉപതെരഞ്ഞെടുപ്പിലൂടെ ബി.ജെ.പി സര്‍ക്കാരിനെതിരെ ഉണ്ടാവണമെന്നും നേതാക്കൾ പറഞ്ഞു.

കേരളത്തില്‍ ഇപ്പോള്‍ നിലവിലുള്ള ഇടതു ഭരണത്തിലെ ഭൂരിപക്ഷം തീരുമാനങ്ങളും ജനവിരുദ്ധവും സാമൂഹിക നീതിയെ ദുര്‍ബലപ്പെടുത്തുന്നതാണ്. കേരളത്തിലെ അഞ്ച് ലക്ഷത്തോളം വരുന്ന ഭൂരഹിതരെ വഞ്ചിക്കുകയും ഹാരിസണടക്കമുള്ള കോര്‍പറേറ്റ് ഭൂമാഫിയകള്‍ക്ക് വേണ്ടി കേസുകള്‍ തോറ്റുകൊടുക്കുകയും അവര്‍ക്ക് കൂടുതല്‍ ആനുകൂല്യങ്ങള്‍ ലഭ്യമാക്കുന്ന നയപരമായ തീരുമാനങ്ങളെടുക്കുകയുമാണ് ഇടതു സർക്കാർ ചെയ്യുന്നത്.

ഭൂപരിഷ്കരണത്തിലെ പിഴവുകള്‍ പരിഹരിക്കുന്നതിന് വേണ്ടി ദലിത്-പിന്നാക്ക വിഭാഗങ്ങള്‍ക്ക് കൃഷി ഭൂമിയടക്കം വിതരണം ചെയ്യുന്നതിന് പകരം കോളനി സ്വഭാവത്തിലുള്ള ഫ്ലാറ്റുകളില്‍ അവരെ ഒതുക്കാനാണ് സര്‍ക്കാര്‍ ശ്രമിക്കുന്നത്. കയ്യേറ്റ ഭൂമി തിരിച്ചുപിടിക്കുന്നതിനുള്ള നിയമനിര്‍മാണത്തില്‍ നിന്ന് പിന്തിരിയുകയും അതിനായി നിയോഗിക്കപ്പെട്ട ഉദ്യോഗസ്ഥരെ പിന്‍വലിക്കുകയാണ് സര്‍ക്കാര്‍ ചെയ്തത്.

നെല്‍വയല്‍ നീർത്തട സംരക്ഷണ നിയമമടക്കമുള്ള പരിസ്ഥിതി നിയമങ്ങള്‍ അട്ടിമറിച്ച് കോർപറേറ്റ് ഖനനമാഫിയകള്‍ക്കും റിയല്‍ എസ്റ്റേറ്റ് മാഫിയകള്‍ക്കും ഒത്താശ ചെയ്യുകയാണ് സർക്കാർ. 2019ലെ പ്രളയ കാലത്തിന് ശേഷം മാത്രം 110 പുതിയ ക്വാറികള്‍ക്ക് അനുമതി നല്‍കി. പാരിസ്ഥിതിക ദുര്‍ബല മേഖലകളെ സംരക്ഷിക്കുന്നതിന് പകരം പശ്ചിമഘട്ടത്തെ തകര്‍ക്കാന്‍ ശ്രമിക്കുന്നവര്‍ക്കൊപ്പമാണ് സര്‍ക്കാര്‍ നിലകൊള്ളുന്നത്.

കേരളീയ ജനതയുടെ നിരന്തര പോരാട്ടത്തിലൂടെ നേടിയെടുത്ത സമ്പൂര്‍ണ മദ്യനിരോധനം എന്ന നാടിനുപകരിക്കുന്ന തീരുമാനത്തെ ഇടതു സര്‍ക്കാര്‍ റദ്ദ് ചെയ്യുകയും മദ്യമാഫിയകളെ സഹായിക്കാനായി കേരളമാകെ മദ്യമൊഴുക്കുകയും ചെയ്തു. കഴിഞ്ഞ ഒമ്പത് മാസത്തിനുള്ളില്‍ മാത്രം 70 പുതിയ ബാറുകളാണ് തുറന്നത്.സംഘ്പരിവാറിനെതിരെ ഉറച്ച നിലപാട് സ്വീകരിക്കേണ്ട സര്‍ക്കാര്‍ പോലീസ് സംവിധാനത്തെ സമ്പൂര്‍ണമായി സംഘ്പരിവാര്‍ താല്‍പര്യങ്ങള്‍ക്ക് വിധേയപ്പെടുത്താന്‍ വിട്ടുകൊടുക്കുകയാണ് ചെയ്തത്.

അതുകൊണ്ടാണ് സംഘ്പരിവാര്‍ പ്രവര്‍ത്തകര്‍ പ്രതിയായിട്ടുള്ള നിരവധി കേസുകളാണ് സംസ്ഥാനത്ത് ദുര്‍ബലമായിപ്പോയ തെന്നും നേതാക്കൾ കുറ്റപ്പെടുത്തി. ദലിത് – പിന്നാക്ക ജനവിഭാഗങ്ങള്‍ക്ക് നീതി നിര്‍വഹണ സംവിധാനത്തില്‍ നിന്ന് ലഭ്യമാകേണ്ട സംരക്ഷണങ്ങള്‍ നിഷേധിക്കപ്പെടുകയും കടുത്ത അക്രമണങ്ങള്‍ക്ക് ഇരയാകേണ്ടിവരികയും ചെയ്തിട്ടുണ്ട്.

ആശ്രിതരെയും ഇടതു സംഘടനാ നേതാക്കളേയും ഉന്നത തസ്തികകളില്‍ തിരുകിക്കയറ്റാന്‍ സ്വതന്ത്ര ഭരണഘടനാ സ്ഥാപനമായ പി.എസ്.സിയെ പോലും ദുരുപയോഗം ചെയ്യുന്നു. പ്രളയവും സാമ്പത്തിക മാന്ദ്യവും നിലനില്‍ക്കുമ്പോഴും ഭരണ ധൂർത്താണ് നടമാടുന്നത്. തെരെഞ്ഞെടുപ്പില്‍ ജനം പരാജയപ്പെടുത്തിയ നേതാക്കളെയും പരിവാരങ്ങളേയും കുടിയിരുത്താന്‍ ക്യാബിനറ്റ് റാങ്കുള്ള തസ്തികള്‍ സൃഷ്ടിച്ച് ഭരണധൂര്‍ത്ത് തുടരുകയാണ് സര്‍ക്കാര്‍ ചെയ്യുന്നത്.

ഇത്തരത്തില്‍ നിരവധി ജനവിരുദ്ധ സമീപനങ്ങള്‍ സ്വീകരിച്ച ഒരു ഭരണകൂടത്തെ വിലയിരുത്താനും ജനകീയ പ്രതിഷേധം അറിയിക്കാനുള്ള അവസരം കൂടിയായി ഉപതെരഞ്ഞെടുപ്പിനെ കാണണമെന്നും നേതാക്കൾ  പറഞ്ഞു.ഈ സമീപനത്തിന്‍റെ അടിസ്ഥാനത്തില്‍ ഒക്ടോബര്‍ 21ന് അഞ്ച് മണ്ഡലങ്ങളില്‍ നടക്കുന്ന ഉപതെരെഞ്ഞെടുപ്പില്‍ വെല്‍ഫെയർ പാർട്ടി യു.ഡി.എഫിനെ പിന്തുണക്കുമെന്നും കെ.എ ഷെഫീക്ക് (സംസ്ഥാന ജനറല്‍ സെക്രട്ടറി) ശ്രീജ നെയ്യാറ്റിന്‍കര (സംസ്ഥാന വൈസ് പ്രസിഡണ്ട്)എന്‍.എം അന്‍സാരി (ജില്ലാ പ്രസിഡണ്ട്, തിരുവനന്തപുരം) തുടങ്ങിയ നേതാക്കൾ വാർത്താസമ്മേളത്തിൽ അറിയിച്ചു . 

 

Read more topics: kerala, Welfare party, press meet,
English summary
Welfare party against RSS and LDF
topbanner

More News from this section

Subscribe by Email