Friday August 23rd, 2019 - 1:50:am
topbanner
topbanner

കവളപ്പാറയിലേക്ക് കാഴ്ച്ചക്കാരായി പോവാതിരിക്കൂ; അഭ്യര്‍ത്ഥനയുമായി സണ്ണി വെയ്ന്‍

JB
കവളപ്പാറയിലേക്ക് കാഴ്ച്ചക്കാരായി പോവാതിരിക്കൂ; അഭ്യര്‍ത്ഥനയുമായി സണ്ണി വെയ്ന്‍

കേരളം ഇക്കൊല്ലം നേരിട്ട ഏറ്റവും വലിയ മഴക്കെടുതി നേരിട്ടത് മലപ്പുറം കവളപ്പാറയിലായിരുന്നു. മേപ്പാടിയിലും കവളപ്പാറയിലും നിരവധി ജനങ്ങള്‍ക്കാണ് സകലതും നഷ്ടമായത്. ഇവിടെ ഇപ്പോഴും രക്ഷാപ്രവര്‍ത്തനം പുരോഗമിക്കുകയാണ്. എന്നാല്‍ ഇവിടെയെത്തുന്ന കാഴ്ച്ചക്കാര്‍ രക്ഷാപ്രവര്‍ത്തനത്തിന് വിലങ്ങുതടിയാവുകയാണ്. മഴ കുറഞ്ഞതോടെ ഒരു പ്രദേശം മുഴുവന്‍ ഒലിച്ചു പോയ സംഭവ സ്ഥലം നേരിട്ടു കാണാനായി നിരവധിയാളുകളാണ് വാഹനങ്ങളിലും മറ്റുമായി ഇവിടേയ്ക്ക് എത്തുന്നതെന്ന് പല മാധ്യമങ്ങളും കഴിഞ്ഞദിവസം ചൂണ്ടിക്കാട്ടിയിരുന്നു.

ഇതിനാല്‍ രക്ഷാപ്രവര്‍ത്തകര്‍ക്കുള്ള വാഹനങ്ങള്‍ പോലും പലയിടത്തും കുടുങ്ങി കിടക്കുകയാണ്. ഈ അവസ്ഥ ചൂണ്ടിക്കാട്ടി രംഗത്തെത്തിയിരിക്കുകയാണ് നടന്‍ സണ്ണി വെയ്ന്‍.കവളപ്പാറയിലേക്ക് കാഴ്ച്ചക്കാരായി പോവാതിരിക്കുവെന്ന് അഭ്യര്‍ത്ഥിച്ചാണ് സണ്ണി വെയ്ന്‍ രംഗത്ത് വന്നത്. ഇക്കാര്യം വ്യക്തമാക്കിക്കൊണ്ട് സണ്ണി വെയ്ന്‍ സോഷ്യല്‍ മീഡിയയില്‍ കുറിച്ചത് ഇങ്ങനെ.

'കവളപ്പാറയിലേക്ക് ആളുകളുടെ ഒഴുക്കാണ്, ദുരിതാശ്വാസ പ്രവര്‍ത്തനങ്ങള്‍ക്ക് വേണ്ടി അല്ല കെട്ടോ, ലീവ് ആയത് കൊണ്ട് ഉരുള്‍പ്പൊട്ടിയ സ്ഥലം കാണാന്‍ വന്നവരാണത്രേ. ഇവരെ കൊണ്ടും ഇവര് വന്ന വാഹനങ്ങളെ കൊണ്ടും രക്ഷാപ്രവര്‍ത്തകര്‍ക്ക് ഉണ്ടാവുന്ന ബുദ്ധിമുട്ട് ചില്ലറയല്ല, കിലോമീറ്റര്‍ കണക്കിന് ബ്ലോക്കാണ്, ആംബുലന്‍സ് ഉള്‍പ്പെടെയുള്ള രക്ഷാപ്രവര്‍ത്തകരുടെ വാഹനങ്ങള്‍ കുടിങ്ങി കിടക്കുന്നു. കാഴ്ച്ചക്കാരായി കവളപ്പാറയിലേക്ക് പോവാതിരിക്കുക എന്നതാണ് ഈ സമയത്തെ ഏറ്റവും വലിയ രക്ഷാപ്രവര്‍ത്തനം.'

കവളപ്പാറയില്‍ നിന്ന് ഇന്നലെ ആറ് മൃതദേഹങ്ങള്‍ കണ്ടെടുത്തിരുന്നു. കവളപ്പാറയില്‍ ഉരുള്‍പൊട്ടലില്‍ കാണാതായ 63 പേരില്‍ നാലുപേര്‍ ബന്ധുവീടുകളിലാണെന്ന സ്ഥിരീകരണം എത്തിയതോടെ 59 പേര്‍ അപകടത്തില്‍ പെട്ടു എന്നാണ് ഒടുവിലത്തെ കണക്ക്. ഒറ്റ രാത്രി കൊണ്ട് കവളപ്പാറയിലെ 44 വീടുകളാണ് മണ്ണിനടിയില്‍ ആയത്. നൂറ് ഏക്കറോളം ഭൂമി ഒലിച്ചു പോയ പ്രദേശത്ത് നിന്ന് കണാതായത് 63 പേരെയാണെന്ന് ജില്ലാ ഭരണകൂടം നേരത്തെ അറിയിച്ചിരുന്നു. 20 മൃതദേഹങ്ങള്‍ ഇതിനോടകം രക്ഷാപ്രവര്‍ത്തകര്‍ കണ്ടെത്തി. ഇനി കണ്ടെത്താനുള്ളത് 39 പേരെയാണ്. 50 മുതല്‍ 60 അടി വരെ ഉയരത്തിലാണ് കവളപ്പാറയില്‍ മണ്ണ് അടിഞ്ഞു കൂടിയിരിക്കുന്നത്.

ജെസിബി പോലെയുള്ള യന്ത്രങ്ങള്‍ പ്രദേശത്ത് കൂടുതലായി എത്തിച്ച് തെരച്ചില്‍ നടത്തണമെന്നാണ് പ്രാദേശിവാസികളുടെ ആവശ്യം. മണ്ണ് മൂടിയതോടെ വീടുകളുടെ യാഥാര്‍ത്ഥ സ്ഥാനം കണ്ടുപിടിക്കാന്‍ കഴിയാത്ത അവസ്ഥയിലാണ് പ്രദേശവാസികള്‍. മണ്ണിനടിയില്‍ അകപ്പെട്ട സൈനികനായ വിഷ്ണുവിനെയും കുടുംബത്തെയും ഇതു വരെ കണ്ടെത്താന്‍ കഴിഞ്ഞിട്ടില്ല.

 

English summary
SUNNY WAYN TALKING ABOUT KAVALAPPARA LANDSLID
topbanner

More News from this section

Subscribe by Email