Sunday September 26th, 2021 - 5:37:pm

രണ്ടു വയസുകാരിയുടെ അമ്മയെ കാണാനുള്ള ശാഠ്യത്തിനു മുന്നില്‍ വിലക്കുകള്‍ വഴിമാറി

Anusha Aroli
രണ്ടു വയസുകാരിയുടെ അമ്മയെ കാണാനുള്ള ശാഠ്യത്തിനു മുന്നില്‍ വിലക്കുകള്‍ വഴിമാറി

തൃശൂര്‍: ലോക്ക്ഡൗണ്‍ വിലക്കുകള്‍ രണ്ടു വയസുകാരിയുടെ അമ്മയെ കാണാനുള്ള ശാഠ്യത്തിനു മുന്നില്‍ വഴിമാറി. സാങ്കേതികത്വങ്ങള്‍ക്കും വിലക്കുകള്‍ക്കുമപ്പുറം മനുഷ്യസ്‌നേഹത്തിന് വിലകല്‍പ്പിച്ച പോലീസുകാരുടെ സഹായത്തോടെ തലശേരിയില്‍നിന്ന് ചാവക്കാട് പേരകത്തെ വീട്ടിലേക്ക് കുട്ടിയെ എത്തിച്ചു.

കേരളഓണ്‍ലൈന്‍ വാര്‍ത്തകള്‍ ടെലിഗ്രാമില്‍ ലഭിക്കാന്‍ ക്ലിക്ക് ചെയ്യുക

ചാവക്കാട് പേരകം തയ്യില്‍ സുബീഷിന്റെയും നീതുവിന്റെയും മകളായ സാഷിയാണ് അമ്മയെ കാണാനുള്ള സ്‌നേഹസമരത്തില്‍ വിജയിച്ചത്. പാലക്കാട്ടെ ഒരു ഫാര്‍മസ്യൂട്ടിക്കല്‍ കമ്പനിയില്‍ ജീവനക്കാരിയാണ് നീതു. ഇവരുടെ വീട് തലശേരി തിരുവങ്ങാട്ടാണ്. ലോക്ക്ഡൗണ്‍ പ്രഖ്യാപനത്തിന് രണ്ടുദിവസം മുമ്പ് നീതുവിന്റെ അമ്മ പുഷ്പലത പേരകത്തെ വീട്ടില്‍നിന്ന് കുട്ടിയെ കൂട്ടികൊണ്ട് പോയി.

പാലക്കാട്ടുനിന്ന് നീതു തലശേരിയിലേക്ക് പോകാനായിരുന്നു പരിപാടി. ലോക്ക്ഡൗണ്‍ കാരണം യാത്ര നടന്നില്ല. ഒരാഴ്ച കുട്ടി അമ്മൂമ്മയോടൊപ്പം കഴിഞ്ഞു. പിന്നീട് അമ്മയെ കാണണമെന്നായി. കരച്ചിലായി, ബഹളമായി. ആര്‍ക്കും യാത്ര ചെയ്യാന്‍ കഴിയാത്ത സാഹചര്യത്തിലായതിനാല്‍ കുഞ്ഞ് കരഞ്ഞു തളര്‍ന്നു. പിന്നീട് ഭക്ഷണം കഴിക്കാതെയായി. ലോക്ക്ഡൗണ്‍ പിന്നെയും നീട്ടിയതോടെ പ്രശ്‌നം രൂക്ഷമായി.

തുടര്‍ന്നാണ് കെ.വി. അബ്ദുള്‍ ഖാദര്‍ എം.എല്‍.എയെ സമീപിക്കുന്നത്. അദ്ദേഹം കുട്ടിയുടെ അഛന്‍ സുബീഷിന് കത്തു നല്‍കി. രണ്ടു വയസുകാരിയെ അമ്മയുടെ അടുത്ത് എത്തിക്കാന്‍ അഛന് യാത്രാനുമതി നല്‍കണം എന്നായിരുന്നു കത്തിലെഴുതിയിരുന്നത്. വെള്ളിയാഴ്ച സുബീഷ് കത്തുമായി കാറില്‍ യാത്ര തിരിച്ചു. ചാവക്കാട്ടുനിന്ന് കോഴിക്കോട് വടകര വഴിയുള്ള യാത്രയില്‍ നിരവധി തവണ പോലീസ് കാറ് തടഞ്ഞു.എല്ലായിടത്തും കത്ത് കാണിച്ചു.

പോലീസുദ്യോഗസ്ഥര്‍ പരസ്പരം ചര്‍ച്ച ചെയ്ത് യാത്രാനുമതി നല്‍കി. വെള്ളിയാഴ്ച തന്നെ കുട്ടിയെ പേരകത്തെ വീട്ടിലെത്തിച്ചു. രാത്രി 9.45ന് വീട്ടിലെത്തി. അമ്മയെ കാണാനുള്ള രണ്ടു വയസുകാരിയുടെ ആഗ്രഹം സഫലമായി. അവളെ കാത്തിരുന്ന അമ്മ നീതുവിനും സന്തോഷം.

ഇന്നലെ രാവിലെ കെ.വി. അബ്ദുള്‍കാദര്‍ എം.എല്‍. എ. സാഷിയുടെ വീട് സന്ദര്‍ശിച്ചു. സി.പി.എം. ബ്രാഞ്ച് സെക്രട്ടറി എ.വി. അഭിലാഷ്, എറിന്‍ ആന്റണി, വാര്‍ഡ് കൗണ്‍സിലര്‍ പ്രസീത മുരളീധരന്‍ എന്നിവര്‍ എം.എല്‍.എയോടൊപ്പം ഉണ്ടായിരുന്നു.

Read more topics: thrissur,chavakkad,child,mets,mom
English summary
thrissur chavakkad child mets her mom
topbanner

More News from this section

Subscribe by Email