പാലക്കാട് ജില്ലയില്‍ കൂടുതല്‍ രോഗികള്‍ കടമ്പഴിപ്പുറത്ത്; ആറ് വാര്‍ഡുകള്‍ കണ്ടെയ്‌മെന്റ് സോണുകള്‍

google news
പാലക്കാട് ജില്ലയില്‍ കൂടുതല്‍ രോഗികള്‍ കടമ്പഴിപ്പുറത്ത്; ആറ് വാര്‍ഡുകള്‍ കണ്ടെയ്‌മെന്റ് സോണുകള്‍

പാലക്കാട്: കോവിഡ് സ്ഥിരീകരിച്ച് 105 പേര്‍ ചികിത്സയില്‍ കഴിയുന്ന ജില്ലയില്‍ ഏറ്റവും കൂടുതല്‍ രോഗികളുള്ള പഞ്ചായത്തായി കടമ്പഴിപ്പുറം മാറി. ഇതുവരെ ഇതര സംസ്ഥാനങ്ങളില്‍ നിന്നെത്തിയ 11 പേര്‍ക്ക് കോവിഡ് സ്ഥിരീകരിക്കുകയും ആറു വാര്‍ഡുകള്‍ കണ്ടെയ്‌മെന്റ് സോണുകളായി പ്രഖ്യാപിക്കുകയും ചെയ്തു.

മാര്‍ച്ച് 24നാണ് ജില്ലയില്‍ ആദ്യമായി കോവിഡ് സ്ഥിരീകരിച്ചത്. ഒന്നര മാസത്തിന് ശേഷം മേയ് 11നാണ് കടമ്പഴിപ്പുറത്ത് ആദ്യമായി കൊവിഡ് ബാധയുണ്ടായത്. ചെന്നൈയില്‍ നിന്നെത്തി നീരീക്ഷണത്തില്‍ തുടര്‍ന്ന 13ാം വാര്‍ഡിലെ വ്യക്തിക്കാണ് രോഗം സ്ഥിരീകരിച്ചത്.

തുടര്‍ന്നുള്ള ദിവസങ്ങളില്‍ രണ്ടാം വാര്‍ഡ്, പുലാപ്പറ്റ നാലാം വാര്‍ഡ് അഴിയന്നൂര്‍ 11ാം വാര്‍ഡ് പാലാരി 15ാം വാര്‍ഡ് പുല്ലുണ്ടശേരി 13ാം വാര്‍ഡ് എന്നിവിടങ്ങളില്‍ ഒരാള്‍ വീതവും ആലങ്ങാട് 16ാം വാര്‍ഡിലെ മൂന്നുപേര്‍ക്കും വേട്ടേക്കര 18ാം വാര്‍ഡിലെ രണ്ടുപേര്‍ക്കും രോഗം സ്ഥിരീകരിച്ചു.

ഇതുവരെ 253 പേര്‍ ഇതര സംസ്ഥാനങ്ങളില്‍ നിന്നും ഒരാള്‍ വിദേശത്തു നിന്നും പഞ്ചായത്തിലെത്തി. ഇതര സംസ്ഥാനത്ത് നിന്നെത്തിയ 99 പേരും ഇവരുമായി നേരിട്ടോ അല്ലാതെയോ സമ്പര്‍ക്കമുണ്ടെന്ന് സംശയിക്കുന്ന 40 പേരും വിദേശത്ത് നിന്നുവന്നയാളുള്‍പ്പെടെ 141 പേര്‍ നിരീക്ഷണത്തിലുണ്ട്.

129 പേര്‍ വീടുകളിലും ഏഴുപേര്‍ ശ്രീകൃഷ്ണപുരം സെന്‍ട്രല്‍ സ്‌കൂളിലും ഒരാള്‍ വേട്ടേക്കര എ.എല്‍.പി.എസിലും മൂന്നുപേര്‍ വിവിധ അംഗന്‍വാടികളിലുമാണ്. 170ല്‍ അധികം സാമ്പിളുകളാണ് ഇതുവരെ പരിശോധനക്കയച്ചത്.

നിരീക്ഷണത്തില്‍ കഴിയുന്നവരെയും ആരോഗ്യ പ്രവര്‍ത്തകരെയും പോലീസ് സേനയെയും സഹായിക്കുന്നതിനായി 24 മണിക്കൂറും പ്രവര്‍ത്തിക്കുന്ന സന്നദ്ധസേന രൂപീകരിച്ചു. നിരീക്ഷണത്തില്‍ കഴിയുന്നവരെ ദിവസവും രണ്ടുതവണ സന്ദര്‍ശിച്ച് ആരോഗ്യസ്ഥിതി വിലയിരുത്തും. ആരോഗ്യ വകുപ്പ് ജി.യു.പി.എസില്‍ സ്രവ പരിശോധന ക്യാമ്പ് സംഘടിപ്പിച്ചു.

വാര്‍ഡ് പഞ്ചായത്തുതല സമിതി സജീവമായി പ്രതിരോധ രംഗത്തുണ്ട്. അന്യസംസ്ഥാനങ്ങളില്‍ നിന്നെത്തിയവര്‍ക്ക് പുറമേ രോഗം സ്ഥിരീകരിച്ചവരുടെ ബന്ധുക്കളും നിരീക്ഷണത്തിലുണ്ട്. സമ്പര്‍ക്കം മൂലം രോഗം പകരാതിരിക്കാന്‍ പഞ്ചായത്ത് പരിധിയില്‍ നിയന്ത്രണങ്ങള്‍ കര്‍ക്കശമാക്കും. ഇത് ലംഘിക്കുന്നവര്‍ക്കെതിരെ പോലീസിന്റെ സഹായത്തോടെ കര്‍ശന നിയമ നടപടി സ്വീകരിക്കും.

The post പാലക്കാട് ജില്ലയില്‍ കൂടുതല്‍ രോഗികള്‍ കടമ്പഴിപ്പുറത്ത്; ആറ് വാര്‍ഡുകള്‍ കണ്ടെയ്‌മെന്റ് സോണുകള്‍ first appeared on Keralaonlinenews.