Friday April 26th, 2019 - 1:48:am
topbanner
topbanner

ലോക്സഭാ തിരഞ്ഞെടുപ്പ് ഹരിതാഭമാക്കാൻ കൈപുസ്തകം; പ്രസിദ്ധികരണത്തിനു ചുക്കാൻ പിടിച്ചത് ചീഫ് ഇലക്ടറൽ ഓഫീസർ

RA
ലോക്സഭാ തിരഞ്ഞെടുപ്പ് ഹരിതാഭമാക്കാൻ കൈപുസ്തകം; പ്രസിദ്ധികരണത്തിനു ചുക്കാൻ പിടിച്ചത് ചീഫ് ഇലക്ടറൽ ഓഫീസർ

കോട്ടയം : കേന്ദ്ര ഇലക്ഷൻ കമ്മീഷന്റെ പെരുമാറ്റ ചട്ടത്തിലെ പ്രധാന നിർദ്ദേശങ്ങളിൽ ഒന്നായ പ്രകൃതി സൗഹൃദ തിരഞ്ഞെടുപ്പ് യാഥാർഥ്യമാക്കാൻ കൈപുസ്തകവുമായി ഹരിതകേരളം മിഷനും ശുചിത്വ മിഷനും. പ്രകൃതിയോട് ഇണങ്ങിയുള്ള ഇലക്ഷൻ പ്രചരണത്തിനു ഏതൊക്കെ വസ്തുക്കൾ ഉപയോഗിക്കാം എന്നതിനെ കുറിച്ചുള്ള രാഷ്ട്രീയ സംഘടനകളുടെയും , പൊതുജനങ്ങളുടെയും സംശയങ്ങൾ ദൂരീകരിച്ചു ഹരിത തിരഞ്ഞെടുപ്പ് നടപ്പിലാക്കുക എന്ന ലക്ഷ്യത്തോടെ ചീഫ് ഇലക്ടറൽ ഓഫീസർ ടീക്കാറാം മീണയുടെ നിർദ്ദേശ പ്രകാരമാണ് കൈപ്പുസ്തകം പ്രസിദ്ധികരിച്ചിരിക്കുന്നത്.

കാർട്ടൂൺ ചിത്രങ്ങൾ ഉൾപ്പെടുത്തി സാധാരണക്കാർക്ക് വേഗത്തിൽ കാര്യം ഗ്രഹിക്കാൻ പറ്റുന്ന രീതിയിൽ നിരവധി കാർട്ടൂൺ ചിത്രങ്ങൾ ഉൾപ്പെടുത്തി വളരെ ലളിതമായ ഭാഷയിലാണ് പുസ്തകത്തിന്റെ രചന. ഏതൊക്കെ തരത്തിലുള്ള പ്രചാരണ ബോർഡുകൾ ഉപയോഗിക്കാം, കൊടി തോരണങ്ങൾ എങ്ങനെ നിർമ്മിക്കാം, പ്ലാസ്റ്റിക് കുപ്പി വെള്ളം ഒഴിവാക്കേണ്ട രീതി, സ്ഥാനാർത്ഥികളുടെ വാഹനങ്ങൾ പ്രകൃതി സൗഹൃദമായി എങ്ങനെ അലങ്കരിക്കാം, പ്ലാസ്റ്റിക് ഹാരങ്ങൾ ഒഴിവാക്കിയുള്ള സ്വീകരണം, ഭക്ഷണ വിതരണത്തിന് സ്റ്റീൽ പാത്രങ്ങളും ഗ്ലാസുകളും ഉപയോഗിക്കുക, ഇലക്ഷൻ പ്രചാരണ നോട്ടീസിൽ ഹരിത സന്ദേശങ്ങൾ ഉൾപ്പെടുത്തുക തുടങ്ങിയവയെ കുറിച്ചുള്ള വിശദമായ വിവരങ്ങളാണ് കൈപുസ്തകത്തിൽ ഇടംപിടിച്ചിരിക്കുന്നത്.

കൂടാതെ തിരഞ്ഞെടുപ്പ് കഴിഞ്ഞാൽ മാലിന്യങ്ങൾ എങ്ങനെ വേർതിരിച്ചു സംസ്കരിക്കാം എന്നിവയെ കുറിച്ചും അവബോധം നൽകിയിട്ടുണ്ട്. തിരഞ്ഞെടുപ്പിൽ ഫ്ലക്സ് ബോർഡുകൾ നിരോധിച്ചുള്ള ഹൈക്കോടതി ഉത്തരവും, പരിസ്ഥിതി സൗഹൃദ തിരഞ്ഞെടുപ്പ് സംബന്ധിച്ച സംസ്ഥാന ചീഫ് ഇലക്ടറൽ ഓഫീസറുടെ ഉത്തരവും കൈപുസ്തകത്തിനൊപ്പം ചേർത്തിട്ടുണ്ട്. ഹരിതകേരളം മിഷനും ശുചിത്വ മിഷനും കൈകോർത്തു സൗജന്യ പുസ്തക വിതരണത്തിനായി ഒരു ലക്ഷത്തോളം കോപ്പിയാണ് പ്രസിദ്ധീകരിച്ചിരിക്കുന്നത്.

രാജ്യത്തിന് മാതൃകയായി കേരളത്തിലെ തിരഞ്ഞെടുപ്പ് സമ്പൂർണ പ്ലാസ്റ്റിക് വിമുക്ത ഹരിത തിരഞ്ഞെടുപ്പാക്കി മാറ്റുന്നതിന് ഹരിത കേരളം മിഷന്റെ കൈപ്പുസ്തകം വഴികാട്ടിയാകുമെന്ന് പ്രതീക്ഷിക്കുന്നതായി ചീഫ് ഇലക്ടറൽ ഓഫീസർ ടീക്കാറാം മീണ അറിയിച്ചു. പ്രകൃതി സൗഹൃദ തിരഞ്ഞെടുപ്പ് യാഥാർഥ്യമാക്കാൻ രാഷ്ട്രീയ പാർട്ടികളും പൊതുജനങ്ങളും സഹകരിക്കണമെന്ന് അദ്ദേഹം ആവശ്യപ്പെട്ടു.

 

English summary
loksaba election text book
topbanner

More News from this section

Subscribe by Email